Асық ойыны – әр өлкеде әртүрлі ерекшеліктерін сақтай отырып дамыған ұлттық ойындардың ішінде аса танымалы және қазақ халқының дәстүрлі ұлттық ойындарының ең қызықты әрі өте кең тараған түрі. Сондықтан ғасырлар бойы халықтың зердесінде сақталып келген осы бір ойынды өскелең ұрпақты тәрбиелеудің құралы ретінде пайдаланған жөн.
Қазіргі таңда облыс бойынша «Бәрін білгім келеді» интеллектуалдық дамыту зертханасы аясында ата-бабаларымыздан жалғасып келе жатырған байлығымыз, асыл қазынамыз — ұлттық ойынымыз асықты жаңа заман талабына сай модернизациялау, жаңғырту, жаңарту мақсатында алынған «Алтын сақа» жобасы жүзеге асып келеді.
Облыс бойынша 95 мектепке дейнгі ұйымдарда 139 топта 2192 баламен вариативтік компонент бөлігі бойынша асық ойындарына баулу жұмыстарын 238 педагог жүргізуде.
Ал, облыстық «Алтын ұрпақ» жобасы аясында «Асық ату» факультатив жұмыстары 231 жалпы білім беретін мектептердің 386 мектепалды даярлық сыныптарында 6333 тәрбиеленушілермен педагогтар жұмыстанады.
Жоба аясында асықтар туралы мәліметтер жинақталып, «Алтын сақа» акциясы ұйымдастырылды.
Мектеп жасына дейінгі балалардың жас және жеке ерекшеліктерін ескере отырып, «Денсаулық», «Қатынас», «Таным», «Шығармашылық», «Әлеумет» білім беру салаларының мақсат-міндеттерін негізге ала отырып, асықтан әр түрлі оқу құралдары мен дамытушы ойындары ұйымдастырылуда.
Тәрбиенің қалыптасуы – педагог, бала, ата-ана еңбегімен байланысты екендігі айқын. Демек, бұлар береке-бірлікпен жұмыс істеп, бұзылмайтын, айнымайтын темір тәртіпке бас игенде ғана іс оң нәтиже таппақ.
Жас жеткіншектерді нағыз толыққанды тұлғаға айналдыру үшін ұлттық құндылықтар арқылы тәрбие берудің маңызы зор.
Даурия Кудашева,
Облыстық білім беруді дамыту орталығының әдіскері
