Қазанның 19-ы, яғни өткен сенбіде Ақсай қаласында жол апаты орын алып, салдарынан ерлі-зайыптылар қаза тапты деп хабарлайды БҚО полиция департаментінің баспасөз қызметі.
Таңертеңгі уақыт 8.20-да Ақсай қаласында «LadaGranta» маркілі автокөлікті тізгіндеген 1986 жылы туған азамат қарсы жолаққа шығып кетіп «Лада-21114» көлігімен соқтығысады. Осы жол-көлік апатының нәтижесінде «Лада-21114» көлігіндегі 1950 және 1948 жылы туған ерлі-зайыптылар оқиға орнында қаза болған. Ал келесі автокөліктің жүрізушісі мен оның екі жолаушысы түрлі жарақаттармен Ақсай қаласындағы аудандық ауруханаға жеткізілген.
Аталған факті бойынша ҚК-нің 345-бабы 4-бөліміне (көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы салдарынан абайсызда екi немесе одан да көп адамның өлiмiне әкеп соққан іс-әрекет) сәйкес сотқа дейінгі тергеу амалдары басталды.
Сот-медициналық сараптамасының куәландыруына сәйкес «LadaGranta» автокөлігінің жүргізушісі «жеңіл түрдегі» мас күйі жағдайында болғаны белгілі болған.
«PULS» ақпарат
