Бүгін Ғ.Құрманғалиев атындағы облыстық филармонияның кіші залында өткен «Қара өлең – халық қазынасы» атты концерттік бағдарламада аға буын өкілдері өз өнерлерін көрсетті.
Аталмыш шараны қалалық ішкі саясат бөлімінің қолдауымен «Jas Otan» жастар қанатының облыстық филиалы ұйымдастырды. «Ардагерлерді ардақтайық» жобасы аясындағы концерттік бағдарламада халық әндерін дәріптеуші ата-әжелерден құралған шығармашылық ұжымдар әуелете ән шырқап, көрерменге мерекелік көңіл күй сыйлады.
Әдемі кеште республикалық байқаулардың лауреаты, халықтық «Ағалар әуені» вокалды тобы, халықтық «Әже сәлемі», «Асыл ана», көпұлтты, көпбалалы халықтық «Аруаналар» вокалды топтары «Кестелі орамал», «Қариялар», «Гүл-гүл жайна!», «Аруана», «Ахау, бикем» сынды әндерді орындап, тыңдармандардың ыстық қошеметіне бөленді.
Концерттік бағдарламаны ардагерлер мен жастар тамашалады.
Ләззат ҚАЖЫМ
