Бұл жайында ҚР Мәдениет және спорт министрі Ақтоты Райымқұлова Алматы қаласында өткен зиялы қауым өкілдерімен кездесуінде айтты деп хабарлайды BAQ.KZ сайты.
Ведомства басшысы мегаполистегі сала қызметкерлерімен өткен жиында президент Қасым-Жомарт Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» Жолдауы, онда көрсетілген міндеттерді жүзеге асыру жайында айтты.
Министрдің айтуынша, келер жылдан мәдениет саласы қызметкерлерінің еңбекақысы 40 пайызға өседі. Яғни, театр әртістерінің орташа жалақысы 231 мың теңге, ал кітапхана, музей және архив қызметкерлерінің еңбекақысы 164 мың теңге болады. Сөз барысында министр қазір еліміздегі ең төменгі жалақы мәдениет қызметкерлерінде екенін атап өтті. Ал саланың дамуы үшін мамандардың әлеуметтік жағдайы жоғары болғаны маңызды. Сондықтан, ұлттың өнері мен руханиятына еңбек сіңіріп жүрген мәдениет қызметкерлеріне мемлекеттік қолдау арта беретінін жеткізді.
Сондай-ақ ҚР Мәдениет және спорт министрі Ақтоты Райымқұлова әлеуметтік жеңілдіктер мәселесі де қарастырылатынын мәлімдеп: «Мәдениет пен өнер қызметкерлерінің жағдайын көтеру – жоспарымыздың бір тармағы ғана. Қазір әлеуметтік жеңілдіктер мәселесі пысықталып жатыр. Мәдениет және спорт министрлігі меморандумдар әзірлеп, әкімдіктерге жіберді. Оларды орындау үшін әлеуметтік қолдау шараларын, оның ішінде мәдениет және өнер қызметкерлерінің тұрғын үй жағдайын жақсартуды қамтитын салалық жоспарлар бекітілетін болады. Жастардың тұрғын үй алуы үшін 3 миллион 700 мың теңгенің көлеміндегі бюджеттік несие беріледі», – деді.
Зиялы қауым өкілдері Президент Жолдауындағы әлеуметтік мәселелерді шешуге бағытталған бөлігіне ризашылықтарын жеткізді.
«PULS» ақпарат
