Бұл туралы ҚР Білім және ғылым министрлігінің баспасөз қызметі хабарлады. Баспасөз хабарламасында мектеп бітірушілер кешінің форматы туралы да айтылған.
«Оқу жылының аяқталуына орай, оқушылар мен ата-аналарды мектеп бітіру кешін өткізу мәселесі алаңдатады. Сонымен қатар ата-аналар комитетінің ақша жинайтындығы туралы хабарлама жиі түседі. Ол көптеген ата-ана үшін отбасылық бюджетке салмақ салатыны анық. Мұндай хабарламаларға жауап ретінде ҚР Білім және ғылым министрлігі өз тарапынан мектеп бітіру кешін ақшаны үнемдеу үшін кафе, ресторандарда емес, мектеп қабырғасында өткізуді ұсынды. Сондай-ақ министрлік мектеп бітіру кешінің мақсаты — сәнді киімдер мен мол дастарханды көрсету емес, жақсы ұйымдастырылған шара ретінде балалардың, мұғалімдер мен ата-аналардың есінде қаларлық мектепішілік жиын деп есептейді» делінген таратылған хабарламада.
Сонымен бірге баспасөз хабарламасында мектеп бітірушілер кешінің форматы қымбат әрі сән-салтанатқа толы кеш болмауы керектігі айтылған.
«Жылдар бойы тұлғаны қалыптастыруда талмай еңбек еткен педагогтар мен ата-аналар, мектеп қабырғасынан түлеп ұшып, үлкен өмірге қадам басып жатқан кештің басты кейіпкерлері — түлектер арасындағы жылы диалог түрінде өткені абзал. Аталған кеште оқуда озат, жетістікке жеткен, мектеп, аудан, қала, облыс, республикалық, халықаралық деңгейдегі спорттық, интеллектуалдық жарыстарда жеңімпаз болған, мектептің қоғамдық өміріне белсенді атсалысқан балаларды құрметпен атап өту — орынды. Түлектер мектеп бітіру кешінде педагогтардың көмегімен креативті бағдарлама дайындап, ата-аналарына, сүйікті ұстаздарына және жанына жақын сыныптастарына алғыстарын білдіретін мағыналы әрі қызықты етіп ұйымдастыруына болады» делінген хабарламада.
Дереккөзі: BAQ.KZ
