Кез келген мемлекеттің тұрақты дамуы ең алдымен заң үстемдігіне, азаматтардың құқықтарының қорғалуына және қоғамдағы әділдік қағидаттарының сақталуына байланысты. Осы тұрғыдан алғанда, Конституция елдің құқықтық жүйесінің негізін қалыптастырып қана қоймай, мемлекет пен азамат арасындағы өзара жауапкершілікті айқындайтын басты құжат болып саналады.
Қазақстанның жаңа Конституциясында адам құқықтары мен бостандықтарын қорғау, азаматтардың заңды мүдделерін қамтамасыз ету және олардың қоғам өміріне толыққанды қатысуына жағдай жасау мәселелеріне ерекше мән берілген.
Адамның қадір-қасиетін құрметтеу, заң алдындағы теңдік, жеке құқықтарға қол сұғылмаушылық және әділдік қағидаттары құқықтық мемлекеттің негізгі белгілері болып табылады. Бұл нормалар әрбір азаматтың өз мүмкіндіктерін жүзеге асыруына және қоғамда өзін қауіпсіз сезінуіне негіз болады.
Конституциялық кепілдіктердің маңыздылығы олардың күнделікті өмірде жүзеге асуымен өлшенеді. Азаматтардың сапалы білім алуы, медициналық көмекке қол жеткізуі, еңбек етуі, өз пікірін білдіруі және заңды мүдделерін қорғауы – құқықтық мемлекеттің нақты көрінісі.
Сонымен қатар құқықтар мен бостандықтар жауапкершілікпен қатар жүреді. Әрбір азамат заң талаптарын сақтап, өзге адамдардың құқықтары мен бостандықтарын құрметтеуге міндетті.
Конституцияның басты құндылығы – адам мүддесін мемлекеттік саясаттың маңызды бағдарларының бірі ретінде айқындауында. Сондықтан Ата Заң нормаларын білу және оларды күнделікті өмірде басшылыққа алу әрбір азамат үшін маңызды.
