2021 жылдың 1 наурызынан бастап Қазақстан Республикасының Бас мемлекеттік санитариялық дәрігерінің 2021 жылғы 27 ақпандағы № 9 қаулысына сәйкес, сондай-ақ санитариялық-эпидемиологиялық жағдайдың жақсаруы мен тұрақтануына байланысты, жалпы білім беретін мектептердің 1-5 сынып білім алушыларын аралас форматта оқытуға рұқсат етілген. Бұл туралы бүгінгі өткен брифингте БҚО білім басқармасы басшысының орынбасары Светлана Темірғалиева айтты.
Өңірлердегі санитариялық-эпидемиологиялық жағдайды ескере отырып, қай оқу пәндерінің штаттық немесе қашықтан оқыту форматтарында жүргізілуін және оқу сағаттарының санын анықтауды мектептер дербес шешеді.
Бұл ретте мектептер осы оқу жылында қолданыстағы жұмыс оқу жоспарларын басшылыққа алады.
Сонымен қатар, Білім және ғылым министрлігі «Көркем еңбек» және «Музыка» пәндерін 1-5 сыныптарда қашықтан асинхронды форматта қалдыруды, қалған пәндерді штаттық форматқа көшіруді ұсынады.
Тек ерекше жағдайларда, ауырғанда немесе науқастармен қарым-қатынас жағдайларында ата-аналардың өтініші бойынша балаларды қашықтан форматында оқытуға қалдыруға рұқсат етіледі.
Білім беру процесінің барлық қатысушылары санитариялық-эпидемиологиялық талаптарды сақтауы тиіс. Мектеп басшылары балалардың қауіпсіздігін және денсаулығын сақтау үшін барлық жағдайларды қамтамасыз етеді. Білім алушылар мен педагогтер жеке гигиена ережелерін және санитариялық қауіпсіздік шараларын сақтайды.
Ата-аналар тарапынан балалардың жеке гигиенаны сақтауы және әлеуметтік қашықтықты сақтау қажеттігін түсіндіру өте маңызды.
1-5 сыныптардың барлық оқушыларын мектепке қайтару бастауыш мектеп деңгейінде базалық білімнің, қажетті дағдылар мен құзыреттердің қалыптасуымен байланысты болып отыр. Олар үшін әлеуметтену және қарым-қатынас процестерінің жалғасуы, оқыту кезінде ұжымдық өзара қарым-қатынастың қол жетімді болуы маңызды.
Сондықтан бірінші кезекте осы сыныптар бойынша шешім қабылданды.
1 наурыздан сабақтан тыс уақытта білімдегі олқылықтарды толықтыру үшін оқушыларды жеке оқыту 15 адамнан аспайтын топтарда мүмкін болады. Бұл жағдай әлі де қашықтан оқытуда қалып отырған 6-8, 10 сыныптарға қатысты.
Бұл міндетті емес, мұғалімдердің шешімі мен оқушылардың ата-аналарының келісімі бойынша іске асырылады.
МЕКТЕП ФОРМАСЫНА ҚАТЫСТЫ ШЕШІМДІ АТА-АНАЛАР ӨЗДЕРІ ҚАБЫЛДАЙДЫ
Оқушыларға мектепке міндетті мектеп формасында емес, еркін, ұқыпты және жинақы киімде болуға рұқсат етіледі. Ата-аналарға мектеп формасын сатып алудың қажеті жоқ.
ҰЛТТЫҚ БІРЫҢҒАЙ ТЕСТІЛЕУГЕ ДАЙЫНДЫҚ
Батыс Қазақстан облысының жоғары оқу орындары, педагогикалық колледжі және жеке білім беру орталықтарымен бірлесіп жасалған оқушылардың білімін толықтыру бойынша кешенді жұмыс жоспары бекітілді.
Білім сапасын арттыру оқушылардыңбілімін толықтыру мақсатында ағымдағы жылдың 12 қаңтары мен 15 мамыры аралығында оқушыларды қорытынды аттестаттауға дайындау, білім сапасын көтеру үшін 400-ден астам мектеп бітірушілеріне арналған «On-line» консультациялар ұйымдастырылып, іске асырылуда. «On-line» консультацияларға облыс көлемінде М.Өтемісов атындағы БҚУ, Жәңгірхан атындағы БҚАТУ, «Үздік педагогтер» қауымдастығы, «Достық», «BILIM» білім орталықтарының педагогтарі тартылған.
«БҚО онлайн-кеңес» Telegram каналы арқылы пән мұғалімдеріне және оқушыларға жеке консультациялар өткізілуде ұйымдастырылуда.
«Alternative tutor» онлайн – репетитор жұмысы аясында «Озат тәжірибелі педагогтер» қауымдастығы және М.Өтемісов атындағы БҚУ-і оқытушылары аптасына 3 рет 9, 11 сынып оқушыларына жаратылыстану-математика және қоғамдық – гуманитарлық бағыттары бойынша білімдегі олқылықтарды жою, колледж бен ЖОО-ға түсуге дайындау мақсатымен қолайлы уақытта қосымша сабақтар жүргізеді. 9, 11 сыныптар – 2590 оқушы қамтылады.
