80 жылдық тарихы бар әл-Фараби атындағы Қазақ ұлттық университеті – еліміздегі ең алдыңғы оқу орындарының бірі. Университет — ұлағатты ұстаздардың даналығы мен жастардың жалынды істерін, білім мен ғылымға деген ізденісі мен құштарлығын бойына сіңірген, таусылмас білім ордасы. Қасиетті қарашаңырақ тарихының әрбір кірпіші оның белгілі ғалымдары, оқытушылары мен студент жастарының творчестволық талмас қайраты мен күнделікті еңбегінің арқасында қаланған.
Бүгінгі күні университетте 20000 жуық студенттер білім алып, 1500 астам оқытушылар, олардың ішінде: 27 ҰҒА академигі, 6 Халықаралық жоғары мектеп академиясының академигі, 300 профессорлар мен докторлар, 700 ден астам кандидаттар мен доценттер, 70-ке жуық мемлекеттік және жастар сыйлығының иегерлері қызмет атқарады. ҚазҰУ қабырғасында Қазақстан ғылымының бетке ұстар элитасы шоғырланған.
ҚазҰУ үш маусым қатарынан еліміздегі жоғары оқу орындары арасында жазғы универсиадада жеңімпаз атанып, студенттік спортта ешкімге дес бермей келеді. Жоғары рухани-адамгершілік орта қалыптастыруға «Айналаңды нұрландыр!», «Саламатты және мәдениетті дене», «100 кітап», «ҚазҰУ-Гринкампус» сияқты кең көлемді инновациялық әлеуметтік жобалар септігін тигізуде. Бұлардың барлығы студенттер мен оқытушы-профессорлар құрамының жаңа әлемдік көзқарасының мықты интеллектуалды тұғырнамасын дамытқан «өсу нүктесіне» айналды.
Университеттің қарқынды дамуын жаңа инфрақұрылыс нысандарының бой көтеруінен де байқауға болады. Орталық Азияда теңдесі жоқ жаңа әл-Фараби ғылыми кітапханасы ашылды. Жуық арада «Керемет» жастар ресурстық орталығының тұсауы кесіледі. Жаңа сапалық ұстаным негізінде мұнда «Бір терезе» қағидасымен студенттер барлық қажет қызмет түрлеріне қол жеткізе алады. Жаңа 500 орындық ыңғайлы жатақхана тұрғызылды. Магистранттар мен докторанттарға арналған жас ғалымдар үйінің, заманауи жүзу бассейнінің құрылысы басталды. Әл-Фараби атындағы ҚазҰУ музейі – университеттің мәдени дәстүрі мен бай тарихи мұрасын сақтаушы және рухани — идеологиялық тәрбие беру орталығы.
Бұл орталық — ұлттық мәдени-тарихи нұсқаларды жинақтап, сақтап, насихаттап қана қоймай, жалпы адамзатқа тән үздік ұлттық құндылықтар мен дәстүрде тәрбиеленген, отанын сүйетін, өз болашағын мемлекет болашағымен байланыстыруға ұмтылатын, ел келешегін жалғастырушы, бәсекеге қабілетті жас мамандарды тәрбиелеу міндетін де атқарады.
Университет студенттерінің өмірі қызықтылығымен әрі алуандығымен ерекшеленеді. Ол тек дәрістер мен семинарларға қатысумен ғана шектелмейді. Олар шалқыған шығармашылық қуат пен жастық жалынды, балғын талантты шыңдайтын театр студиялары мен поэтикалық клубтарға, көңілді және тапқырлар сайысына белсене қатысады.
Мәселен, «Сұңқар», «Мәслихат», «Жас Отан» сияқты т.б. маңызды ұйымдарды айтуға болады. Жатақхананың белсенді студенттері жатақхана атынан спорттық, мәдени сайыстарға қатысып тұрады. Осындай қоғамдық жұмыстарға қатысу арқасында студенттер басқа факультет студенттерімен танысып, ой-өрісін кеңейтеді.
Спортпен айналысуға барлық жағдай жасалған (ҚазҰУ қалашығының спорт кешені, Студенттердің спорттық клубы, түрлі секциялар, денсаулық топтары). Қызметкерлер мен студенттердің спартакиадасы ұдайы өткізіліп, олардың қалалық жарыстарға қатынасуы қамтамасыз етіледі.
Университет білім алушы тұлғаның жан-жақты дамуына, өзін-өзі кемелдендіруіне қажетті жағдай жасау үшін бар күш-жігерін салып, студенттік өзін-өзі басқаруға, көшбасшылық қасиеттерді тәрбиелеуге мол мүмкіндіктер тудыруда. Универсиетте Қазақстандағы аса ірі ИНТРАНЕТ желісіне қосылған, әр оқу корпусында Интернетке қосылған компьютерлік залдар жұмыс істейді. Бұл оқытушылар мен студенттерді оқу үдерісінің күнделікті бақылауды қамтамасыз етіп отырады. ҚазҰУ қалашығының барлық аймағы Wi-Fi сымсыз желісімен қамтылған .
Қымбатты оқу бітіруші түлектер сіздерді сапалы білім, саналы тәрбие алу үшін еліміздегі ең алдыңғы оқу орныҚазҰУБілім алуға шақырамыз!!!
Е.Артықова, Н.Сүттібаев,
ҚазҰУ, Шет тілі кафедрасының аға оқытушылары.
Электр.адрес: erkesh_d@mail.ru
