ҚР Цифрлық даму, инновациялар және аэроғарыш өнеркәсібі министрі Асқар Жұмағалиев жақын уақытта мемлекеттік қызметшілерге жұмыс орнында смартфон қолдануға рұқсат берілетінін мәлімдеген. Бұл туралы BAQ.KZ тілшісі жазды.
– Мемлекеттік органдар орналасқан ғимараттардың иелері полициямен бірге сәйкес нұсқаулықтарға қол қоюы тиіс. Содан кейін мемлекеттік қызметшілер смартфон қолдана алады. Бұл ғимарат иелері мен мемлекеттік орган басшыларына тікелей байланысты болып отыр. Нұсқаулыққа қол қоюға кедергі болған барлық мәселелерді біз бүгін үкіметтің қаулысына қол қою арқылы алып тастадық. Ғимарат иелері мен полиция жақын уақытта нұсқаулыққа қол қойған соң мемлекеттік қызметшілер жұмыс орнында смартфон пайдалана береді, – деді министр Үкімет кулуарында.
Асқар Жұмағалиевтің айтуынша, ақпараттық қауіпсіздік мәселесі бойынша жауапкершілікті мемлекеттік қызметшілер мен мемлекеттік органдардың басшылары толық мойнына алады.
Ақпарат және қоғамдық даму министрі Дәурен Абаев мемлекеттік органдар бір айдың ішінде немесе жыл соңына дейін нұсқаулық бойынша ортақ келісімге келуі тиіс екенін жеткізді.
«PULS» ақпарат
