Атамды айтып мақтанамын

Жеңіс  мерекесі  жақындаған  сайын  санаға  сәуле  түсірер  тың  деректер  мен  естеліктер  қайта  жаңғырады.  Қазіргі таңда Ұлы  Отан  соғысының  көзі  тірі  куәгерлері  азайып,  ел  аузында  естелік  болып  қалуда. 

Менің  нағашы атам    Ысмағұл  Аманжолов Ұлы  Отан  соғысына  қатысып, елге  келген  соң  білім  беру  саласында  еңбек  етті.

Ол кісі 1916  жылы  Батыс Қазақстан облысы Тайпақ  ауданы  Сайқұдық  ауылында  дүниеге  келген. Әке — шешесінен  ерте айырылып,  қарындасы Мақпал екеуі  атасы  Аманжолдың  тәрбиесінде  болған.

Әкесі — Қален, анасы — Әсия  екеуі  де  1925 жылы  қайтыс  болғаннан кейін атам Россияның  Самара  қаласындағы  балалар  үйінде  4 жыл  оқып, сауатын  ашады. 1934  жылы  нағашысы  Ниязов  Ғаллам  іздеп  тауып,  елге  алып  келеді. Елде  жаппай  сауаттандыру  саясаты  жүріп  жатқан  кез  екен, елге  келген  соң  мұғалім  болып  жұмыс  жасайды.

1935 — 1936 жылдары Атырау  қаласындағы   мұғалімдер  даярлайтын  техникумды  бітіріп, елге  келіп  қызметін  жалғастырады. Кейін  Орал  қаласындағы  педагогикалық  институтты  сырттай  оқиды.

1939  жылы  армия  қатарына  шақырылып, фин  соғысына  қатысады. 1940  жылы Эстонияның  Перно  қаласына  соғыс  жабдықтарымен  барады.

90 — дивизия  173 — атқыштар  полкі  жанындағы  командирлік  училищені  1941  жылы  бітіріп, осы  жылдың  маусым  айында  Шаухайда  соғысқа  кіреді. Соғыс  жылдарында  Орел, Курск, Смоленск  далаларындағы   шайқастарға  қатысады. Екі  рет  ауыр  жараланады. Майдан  даласындағы  жауынгерлік  ерлігіне  орай   «Жауынгерлік  ерлігі  үшін» медальімен,  дәрежелі  Отан  соғысы  орденімен  марапатталады. Тағы  да  бірнеше  орден,  медальдармен  марапатталады.

Елге  1945 жылы  оралғаннан  кейін  нағашы әжем  Бұрышпен  шаңырақ  көтеріп, мұғалімдік  қызметін  жалғастырады. Сайқұдық, Кеңсуат, Қырыққұдық,  Қурайлысай  ауылдарында  еңбек  еткен. Партия  мүшесі  бола  жүріп,  қоғамдық  істерге  де  белсене  араласқан.

Нағашы атамның  еңбегі  еленбей  қалмады. Елге  еткен  қызметі  үшін  марапаттаулармен, орден,   медальдармен  мадақталды. Сексеннің  сеңгіріне  шығып  дүние  салған  нағашы атамның  артында  қалған  ұрпақтары  тәлімді  тәрбиенің  арқасында  өмірден   өз  орындарын  тапты.

Жарқын  болашақ   үшін  майдан  даласында  да,    еңбек  даласында  да  жан  аямай  күрескен   атамды  мақтан  етемін  және  үлгі  тұтамын.

Арайгүл Қайырғалиқызы

Оставьте ответ

Ваш e-mail не будет опубликован. Обязательные поля помечены *