Жуырда Нұр-Сұлтан қаласында өткен республикалық «Былғары доп – Балдәурен» турнирінен өңіріміздің жас спортшы ұл-қыздары жеңіспен оралды.
2010 жылы туған қыздар арасында Ақжайық ауданының «Бітік» командасы мен Теректі ауданының Подстепное ауылының жалпы орта білім беретін қазақ мектебінің 2008-2009 жылғы туған ұлдар командасы облыс намысын қорғап, жүлделі бірінші орынға ие боп қайтты. Олар байқаудың облыстық кезеңінде жүйрік шығып, Нұр-Сұлтан қаласына жолдама алған болатын.
Футбол турнирінде облыс құрамасы Нұр-Сұлтан, Алматы, Тараз қалалары және Маңғыстау облысының командасымен кездескен. Ойын барысында ұлдар құрамасы тараздық командамен тең түсіп, өзге командаларды айқын басымдықпен жеңген.
– Ойын кезінде төрт командамен кездестік. Команда құрамында 12 ойыншы бар. Өте тартысты ойын болды. Бұл біздің ең үлкен жеңістеріміздің бірі, – дейді команда капитаны Ерасыл Кәрім.
Аталмыш ұлдар командасының жаттықтырушысы, Теректі ауданының Подстепное ауылының жалпы орта білім беретін қазақ мектебінің дене шынықтыру пәнінің мұғалімі Қажет Джалитов.
Гүлзинат ҚИБАТОВА
