«Қазіргі қуанышты жаңалық — дәрігерлердің жалақысын көтеру»

«Нұр Отан» партиясының XVIII съезінен кейін журналистердің сұрағына жауап берген ҚР денсаулық сақтау министрі Елжан Біртанов осылай деді.

«Денсаулық саласына қатысты Мемлекет басшысы нақты тапсырма қойды. Елбасы тікелей атап өткендей, дамытуды қажет ететін ең маңызды бағыт — алғашқы медициналық және амбулаториялық көмек. Себебі дамыған елдерді алсақ, жалпы бүкіл дәрігердің консультациялық көмегінің 80 пайызы — алғашқы медициналық көмектің мамандары, яғни жергілікті учаскелік дәрігерлер, терапевт, педиатрлар», — деді Елжан Біртанов. Сонымен қатар ол осы бағытты дамыту үшін бірнеше нақты тапсырма берілгенін атап өтті.

«Елбасы Жолдауында да ең жиі кездесетін ауруларды арнайы мемлекеттік бағдарламаға көшіруді айтты. Осыған орай 2019 жылдың қаңтарынан бастап, осы бағдарламаны енгізіп жатқан дәрігерлердің, мейірбикелердің жалақысын 20 пайызға көтердік. Қазіргі қуанышты жаңалық — дәрігерлердің жалақысын көтеру», — деп сөзін жалғады министр. Сондай-ақ Елжан Біртанов министрлік осы саладағы басым бағыттарды игеруге дайын екенін айтты.

«Алғашқы көмектің қолжетімділігін арттыру үшін жұмыстар басталып кеткен. Ол үшін дәрігер үйге жақын болу керек. Біз үлкен ауруханаларда жиырма дәрігер отырғанына үйреніп қалғанбыз. Оған жету үшін тұрғындарға қырық минут кететінін анықтадық. Автобусқа отырып жеткенше ұзақ уақыт. Енді осының орнын толтыру үшін мемлекеттік-жекеменшік әріптестік негізінде кіші орталықтар ашылады. Сонда дәрігерге бес-он минутта жететіндей қыламыз. Осылайша, халық алғашқы медициналық көмекке тез қол жеткізеді», — деп сөзін түйіндеді денсаулық сақтау министрі.

Оставьте ответ

Ваш e-mail не будет опубликован. Обязательные поля помечены *